ಹರಡಿ ನಿಂತು ಹೊಳೆವ ಹಾಸ...

ಬಂದಿದೆ ವಸಂತ ಮಾಸ
ಹರಡಿ ನಿಂತು ಹೊಳೆವ ಹಾಸ


ಮಾಗಿ ಬೆನ್ನನೇರಿ ಚೈತ್ರ
ಬಂದು ನಕ್ಕ ಮೋಡಿಗೆ
ಮುಗಿಲಿಗೊರಗಿ ನಿಂತ ಭುವಿಗೆ
ಎಚ್ಚರಾಯ್ತು ಮೆಲ್ಲಗೆ


ಎಲೆಯ ಮರೆಯ ಹಕ್ಕಿ ಕೊರಳ
ಉಕ್ಕಿ ಹರಿದ ಗಾಯನ
ಮರಗಳೆಲೆಯ ಅಪ್ಪಿನಿಂತ
ಹೂವು ತಳಿರು ಕಾರಣ


ಹಸಿರು ಹೊನ್ನ ಧರಿಸಿ ಮೆರೆವ
ಕಾಡಿನೊಡತಿ ಕಣ್ಣಲಿ
ಹೊಳೆದ ಬೆಳಕು ಸುತ್ತ ಸುರಿದು
ಬೆಳ್ಳಿಯಾಯ್ತು ಮಣ್ಣಲಿ


ನೆಳಲು ಬೆಳಕಿನಾಟದೆದಿರು
ಸೂರೆಹೋದ ಮನಸಲಿ
ಹೊಳೆದುದೇನೋ ಆಸೆ ಕನಸು
ಹೇಳದಂಥ ಬಗೆಯಲಿ

-ಈ ಕವಿತೆ ಬರೆದ ಕವಿ ಯಾರೆಂದು ನನಗೆ ಗೊತ್ತಿಲ್ಲ ನಿಮಗೆ ತಿಳಿದಿದ್ದರೆ ತಿಳಿಸಿ...

ಚಿತ್ರದ ಬಗ್ಗೆ- ಸ್ಟೀವನ್ಸ್ ಕ್ರೀಕ್ ಪಾರ್ಕ್ ನಲ್ಲಿ ಉಲಿಯುತ್ತಿದ್ದ ನೀಲಿ ಹಕ್ಕಿ

ವಸಂತ ಹಬ್ಬ-6