ಬೆಳ್ ಬೆಳಕಿನ ಮಲ್ಲಿಗೆ

ನೋಡಮ್ಮಾ ಮುಗಿಲ ತುಂಬ ಬೆಳ್ ಬೆಳಕಿನ ಮಲ್ಲಿಗೆ

ಹಾರಿ ಹೋಗಿ ಕಿತ್ತು ತಂದು ಮುಡಿಸಲೇನು ತುರುಬಿಗೆ

ನಮ್ಮ ಮನೆಯ ಅಂಗಳದಲಿ

ಅರಳಿ ನಗುವ ಹೂವಿಗಿಂಥ

ದೊಡ್ಡವೇನೆ ಅವುಗಳು?

ಹಸಿರು ನೆಲದ ಮೇಲೆ ಅರಳಿ

ನಗುವ ಬದಲು ಅಷ್ಟು ಮೇಲೆ

ಹೋದವೇಕೆ ಅವುಗಳು?

ನಾನೆ ದೇವರಾಗಿದ್ದರೆ

ಚುಕ್ಕಿ ಎಲ್ಲ ನಮ್ಮೂರಿನ

ಮನೆಮನೆಯ ಅಂಗಳದಲಿ

ಅರಳುವಂತೆ ಸೃಷ್ಟಿ ಮಾಡುತಿದ್ದೆನು

ಅಷ್ಟು ತಿಳಿಯಲಿಲ್ಲವೇನೆ

ಜಗವ ಮಾಡಿದಂಥ ದೇವ,

ನಿಜವಾಗಿಯು ದಡ್ಡನು

-ರಾಷ್ಟ್ರ ಕವಿ ಜಿ.ಎಸ್.ಶಿವರುದ್ರಪ್ಪ

ಇವತ್ತಿನ ಪೋಸ್ಟಿಂಗ್ ಗಾಗಿ ವಿಶೇಷವಾಗಿ ಚಿತ್ರ ಬರೆದು ಕೊಟ್ಟಿದ್ದು 5 ವರ್ಷದ ಸಾತ್ವಿಕ್.ನಮ್ಮೂರು ಸನ್ನಿವೇಲ್ ನ Startford ಶಾಲೆಯಲ್ಲಿ pre-K ಓದುತ್ತಿರುವ ಸಾತ್ವಿಕ್ ಗೆ Thomas train ಅಂದ್ರೆ ಪಂಚ ಪ್ರಾಣ.ಈಗ್ಗೆ ಕೆಲವು ದಿನಗಳ ಹಿಂದೆ Thomas train ನ ಯಾವ ಯಾವ friend trainಗಳನ್ನ ಕ್ರಿಸ್ಮಸ್ಸು,ಅವರಪ್ಪ ಊರಿಗೆ ಹೋಗಿದ್ದಾಗ ಅವನು ಗುಡ್ ಬಾಯ್ ತರ ಇದ್ದದ್ದಕ್ಕೆ,ಅವನ ಬರ್ತ್ ಡೇ ಗೆ ಅಂತೆಲ್ಲಾ ಹೇಳಿ ತನ್ನ ಅಪ್ಪ ಅಮ್ಮನ ಹತ್ರ ವಸೂಲು ಮಾಡುತ್ತೀನಿ ಅಂತ ಮುಂದಿನ ಮೂರು ವರ್ಷಕ್ಕೆ ಅವನು ಮಾಡಿಟ್ಟಿರುವ plan ನನಗೆ ಹೇಳಿದ ! ಕೇಳಿ ನಾನು ದಂಗು ಬಡಿದು ಹೋದೆ!

ಸಾತ್ವಿಕ್ ತುಂಬಾ ಹೆಲ್ತ್ ಕಾನ್ಶಿಯಸ್ಸು! ನಾವುಗಳೆಲ್ಲಾ ಬುಫೆ ಊಟದಲ್ಲಿ pizza ಅದೂ ಇದೂ ಅಂತ hi-calorie ಹಾಳು ಮೂಳು ತಿನ್ನುತ್ತಿರುವಾಗ ಅವನಿಗೆ ಯಾರೂ ಹೇಳದೆಯೇ ತಾಜಾ ತರಕಾರಿಗಳ ಹಸಿರು ಸಾಲಡ್ ತಿನ್ನುತ್ತಿರುತ್ತಾನೆ ಮತ್ತು Broccoli ಅವನ ಫೇವರೆಟ್ (Seinfeld ನೆನಪಿಗೆ ಬಂತೇ...?) ಅವನ ಬಗ್ಗೆ ಇರುವ ಒಂದೇ ಒಂದು ಕಂಪ್ಲೇಂಟ್ ಅಂದ್ರೆ ಅವನು ಅಮ್ಮಕೂಚಿ ಮತ್ತು ಮೂಡಿ!

ಈಗ ಕೆಲವು ದಿನಗಳಿಂದ ರಾಮಾಯಣದ ವಿ.ಸಿ.ಡಿ ಪ್ರಭಾವದಿಂದ ಆಟದ ಪ್ಲ್ಯಾಸ್ಟಿಕ್ ಕಡ್ಡಿಗಳಿಂದ ತಾನೇ ಬಿಲ್ಲು ಬಾಣ ಮಾಡಿ ಕೊಂಡಿದ್ದಾನೆ.ಅಥವಾ ತಾನು ಮಾಡಿಕೊಂಡಿರುವುದನ್ನು ಬಿಲ್ಲು ಬಾಣ ಅಂತ ನಂಬಿಕೊಂಡಿದ್ದಾನೆ ಮತ್ತು ಅವರ ಮನೆಗೆ ಹೋದವರಿಗೆಲ್ಲಾ ಹಾಗಂತ ಹೇಳಿ ಅದನ್ನ ತೋರಿಸುತ್ತಾನೆ.ಕೆಲವು ಸಲ ತಾನು ರಾಮ ಎಂದೂ,ಕೆಲವು ಸಲ ಲಕ್ಷ್ಮಣ ಎಂದೂ ಮತ್ತು ಸಾಮಾನ್ಯವಾಗಿ ತಾನು ಹನುಮಂತ ಎಂದು ಹೇಳಿ ಕೊಳ್ಳುತ್ತಿರುತ್ತಾನೆ

ಇವತ್ತಿನ `ಚಿಣ್ಣರ ದಿನ ವಿಶೇಷ'ಕ್ಕಾಗಿ ಚಿತ್ರ ಬರೆದು ಕೊಟ್ಟ ಸಾತ್ವಿಕ್ ಗೆ ಮತ್ತು ಬರೆಯಿಸಿ ಕೊಟ್ಟ ಅವನ ಅಮ್ಮ ರಶ್ಮಿಗೆ ಥ್ಯಾಂಕ್ಸ್