ನೆಮ್ಮದಿ ತರಲಿ

ನೀಡು ಬಾ ನೀಡು ಬಾ
ಹೊಸ ವರ್ಷಕೆ ಹೊಸ ಕೊಡುಗೆಯ
ಈ ನಾಡಿಗೆ ನೀಡು ಬಾ
ನೀಡು ಬಾ ನೀಡು ಬಾ

ಚದುರಿ ಬಿದ್ದ ಚೂರುಗಳಿಗೆ ಅಯಸ್ಕಾಂತ ಶಕ್ತಿಯ
ಮುರಿದು ಬಿದ್ದ ಬಯಕೆಗಳಿಗೆ ಹಾರುವಂಥ ರೆಕ್ಕೆಯ
ಕಣ್ಣ ತೆರೆವ ಬೀಜಗಳಿಗೆ ಮೇಲೇಳುವ ತ್ರಾಣವಾ
ನೀಡು ಬಾ ನೀಡು ಬಾ

ಗಡಿ ಕಾಯುವ ಎಚ್ಚರಕ್ಕೆ ಬೆಂಬಲಗಳ ರಕ್ಷೆಯಾ
ದುರಾಕ್ರಮಣದಾತುರಕ್ಕೆ ಸಿಡಿ ಗುಂಡಿನ ಶಿಕ್ಷೆಯಾ
ಸ್ನೇಹ ,ಪ್ರೀತಿ,ವಿಶ್ವಾಸಕೆ ಮುಗುಳುನಗೆಯ ಮಾಲೆಯಾ
ನೀಡು ಬಾ ನೀಡು ಬಾ

ದುಡಿದು ದಣಿದು ಮಲಗಿದೆದೆಗೆ ಕೃತಜ್ಞತೆಯ ನಮನವಾ
ಸುಪ್ತ ಉರಿವ ದೀಪಗಳಿಗೆ ಹೊಸ ಬತ್ತಿಯ ತೈಲವಾ
ಹೊಸನಾಡಿಗೆ,ಹೊಸ ಗಾಡಿಯ,ಹೊಸ ಕುದುರೆಯ ಜೋಡಿಯಾ
ನೀಡು ಬಾ ನೀಡು ಬಾ


"ಹೊಸ ವರ್ಷ ನಮ್ಮೆಲ್ಲರಿಗೂ ನೆಮ್ಮದಿ ತರಲಿ"

***************************


ಟಿಪ್ಪಣಿ- ಈಗ್ಗೆ ಹಲವು ವರುಷಗಳ ಹಿಂದೆ ಬೆಂಗಳೂರು ಆಕಾಶವಾಣಿಯಲ್ಲಿ
ನಾನು ಕೇಳಿದ ಈ ಹಾಡನ್ನು ನನಗೆ ನೆನಪಿದ್ದಂತೆ ಇಲ್ಲಿ ಬರೆದಿದ್ದೇನೆ
ಕವನದ ಬರೆದವರ ಹೆಸರು ನೆನಪಿಟ್ಟು ಕೊಳ್ಳದ್ದಕ್ಕೆ ನನ್ನಮೇಲೆ ನನಗೆ ಕೋಪ ಬರುತ್ತಿದೆ
ನಿಮಗೆ ಗೊತ್ತಿದ್ದರೆ ತಿಳಿಸಿ ಹಾಗೇ ಸಾಹಿತ್ಯದಲ್ಲಿ ಏನಾದರೂ ತಪ್ಪಿದ್ದರೆ ತಿದ್ದಿ

ಜಯವೆನ್ನಿರಿ ಬಲ್ಲಿದರೇ...

ಜಯ ಜಯ ಜಯ ಕರ್ನಾಟಕ
ಜಯ ಕನ್ನಡನುಡಿಯೇ...
ಜಯವೆನ್ನಿರಿ ಬಲ್ಲಿದರೇ
ನಮ್ಮ ಒಲವ ನುಡಿ ಪಡೆಯೇ...
ನಮ್ಮ ಒಲವ ನುಡಿ ಪಡೆಯೇ...

ಇವಳೆ ಇವಳೆ....

ಕಳೆದ ವಾರವೆಲ್ಲಾ ಮನೆ ತುಂಬಾ ಹರಟೆ,ನಗು, ಕೀಟಲೆ ,ಕಿತಾಪತಿಗಳದ್ದೇ ಸಾಮ್ರಾಜ್ಯ. ದೂರದೂರಿಂದ ನಮ್ಮ ಕಸಿನ್ನೂ, ಅವನ ಹೆಂಡತಿಯೂ ಪುಟ್ಟ ಮಗುವಿನೊಂದಿಗೆ ಬಂದಿದ್ದರು
ನಮ್ಮಗಳ ಬಾಲ್ಯದ ದಿನಗಳ ಅವಲೋಕನ ಮಾಡಿ ಒಬ್ಬರ ಕಾಲು ಇನ್ನೊಬ್ಬರು ಸಖತ್ತಾಗಿ ಎಳೆದಾಡಿ ಕೊಂಡೆವು ಮನೆಯಲ್ಲಿ ಒಂಥರಾ ನಗೆ ಹಬ್ಬ...ಬೇರೆಲ್ಲಾ ಕೆಲಸ ಬದಿಗಿಟ್ಟು ಹರಟೆಯಲ್ಲೇ ಕಾಲ ಕಳೆದೆವು
ಇಂಥದೊಂದು ಸಂಜೆ ಕಸಿನ್ ಅವನ ಹೆಂಡತಿಗೆ ಮೆಲುದನಿಯಲ್ಲಿ ಏನೋ ಹೇಳುತ್ತಿದ್ದ. ಅವಳು ಆಗಾಗ ಕೆಂಪಾಗುತ್ತಾ,ಮೆತ್ತಗೆ ಗುರ್ ಗುರ್ ಅನ್ನುತ್ತಾ, ಸ್ವಲ್ಪ ಕೋಪ ಕೊಂಚ ನಗುತೋರಿಸುತ್ತಾ ಒಳ್ಳೆ ಏಳು ಬಣ್ಣದ ಕಾಮನ ಬಿಲ್ಲಿನ ಮುಖ ಮಾಡಿಕೊಳ್ಳುತ್ತಿದ್ದಳು. ಅಷ್ಟೊತ್ತಿಗೆ ಟೀ ತರುತ್ತಾ ಇದ್ದ ನಾನು `ಏನಪ್ಪಾ ಸಮಾಚಾರ?'ಅಂತ ಹುಬ್ಬು ಹಾರಿಸಿದೆ .ಅರವಿಂದನ ಮುಖದಲ್ಲೂ ಪ್ರಶ್ನೆ ಅವಳು ಕಣ್ನು ದೊಡ್ಡದು ಮಾಡಿ,(ನಮಗೆ ಕಾಣದಂತೆ!)ಮೊಣಕೈನಿಂದ ತಿವಿಯುತ್ತಿದ್ದುದನ್ನೂ ಗಮನಿಸಿದರೂ ಗಮನಿಸದೆ ಪ್ರಾರಂಭಿಸಿಬಿಟ್ಟ

`ಎಲ್ಲೆಲ್ಲಿ ನೋಡಲೀ ನಿನ್ ಬಟ್ಟೆ ಕಾಣುವೇ
ಮನೆಯನ್ನು ಕೊಳಕ್ ಮಾಡೀ ಹೀಗೇಕೆ ಓಡಾಡುವೇ...

ಆ ಕೆಂಪು ದಾವಣಿ ಅಲ್ಲೇಕೆ ಬಿದ್ದಿದೇ...
ನಿನ್ ಹಳ್ ದಿ ಟೀಶರ್ಟು ಕಾಲ್ ಕಾಲ್ಗೆ ಸಿಗ್ತಿದೆ...
ಯುಗಗಳು ಜಾರಿ ಉರುಳಿದರೇನೂ
ಬ್ಯಾಂಗಲ್ ಸೆಟ್ಟು, ಲಿಪ್ಪು ಸ್ಟಿಕ್ಕು
ಪಾಪು ಬಟ್ಟೆ ಇಲ್ಲೆ ಬಿದ್ದಿದೇ...

ಹೀಗೆ ತನ್ನ ಗಾರ್ಧಭ ಗಾಯನ ಮುಗಿಸಿ `ಹೆಂಗೆ?' ಅಂತ ಹುಬ್ಬು ಹಾರಿಸಿದ!
ಮನೆಯನ್ನ ಒಪ್ಪ ಮಾಡೋದು ಬರೀ ಹೆಂಗಸರ ಗುತ್ತಿಗೇನೇ? ನಂಗೂ ಸ್ವಲ್ಪ ಸಿಟ್ಟು ಬಂತು `ನೀನೇ ಒಂಚೂರು ಎತ್ತಿಡು.. ಕೈಯೇನೂ ಸವೆದು ಹೋಗಲ್ಲಾ..'ಅಂದೆ
ಅದಕ್ಕುತ್ತರವಾಗಿ ಅವನೇನೋ ಹೇಳುವಷ್ಟರಲ್ಲಿ ಅರವಿಂದ `ಏಯ್ ನನ್ನ ಹಾಡು ಕೇಳಿ ಇಲ್ಲಿ' ಅಂತ ಶುರು ಮಾಡಿದ

ಆಕಾಶದಿಂದ ತಲೆ ಮೇಲಿಳಿದ ರಂಭೆ...
ಇವಳೆ ಇವಳೆ....

ಈಗ ದೊಡ್ಡ ಕಣ್ಣು ಬಿಡುವುದು ನನ್ನ ಸರದಿ!ನನ್ನ ಚಿಕ್ಕ ಚಿಕ್ಕ ಕಣ್ಣುಗಳನ್ನೇ ಆದಷ್ಟೂ ದೊಡ್ಡದಾಗಿ ಬಿಟ್ಟೆ
ಆಗವನು ಸ್ವಲ್ಪ ತಡವರಿಸುತ್ತಾ `ಚಂದನದ ಗೊಂಬೆ...' ಅಂತ ಅವಸರವಾಗಿ ಮುಗಿಸಿ ಬಿಟ್ಟ

ಇಷ್ಟೆಲ್ಲಾ ಆದ ಮೇಲೆ ನಾವಿಬ್ಬರು ಹೆಂಗಸರು ಸುಮ್ಮನಿರಲು ಸಾಧ್ಯವೇ? ಸರಿ ಸುರು ಮಾಡಿದೆವು

ಯಾರಿವನೂ ಈ ಮಣ್ ಮೆತ್ತನೂ
ಧೀರರಲ್ಲಿ ಧೀರ ಬಂದ ನಮ್ಮ ಶೂರ
ತಲೆಭಾ....ರ!

ಅದಕ್ಕುತ್ತರವಾಗಿ ಬಂದ ಬುಲೆಟ್ಟು,


`ಎಲ್ಲಿರುವೇ ಮನೆಯ ಕಾಯುವ ಪ್ರೇಯಸಿಯೇ...'

ಹೀಗೇ ಸ್ವಲ್ಪ ಸಮಯ ನಡೆದ ನಂತರ ಕುರುಕಲು ಸಮಾರಾಧನೆ ಶುರುವಾದ್ದ ಪ್ರಯುಕ್ತ ಕದನ ವಿರಾಮ ಘೋಷಿಸಲಾಯಿತು

************************
ಇಂಥಾ ನಗೆ ಬುಗ್ಗೆಗಳು ಆತ್ಮೀಯರು ಸೇರಿದಲ್ಲೆಲ್ಲಾ ಚಿಮ್ಮುತ್ತಿರುತ್ತವೆ.ಸದಾ ಟೆನ್ಶನ್ನಿನ ಇವತ್ತಿನ ಜೀವನದಲ್ಲಿ ನಮ್ಮ ಆರೋಗ್ಯ ,ಉತ್ಸಾಹ ಜೀವಂತ ವಾಗಿರಿಸಲು ಇಂಥವು ಬೇಕೇ ಬೇಕು ನಿಮ್ಮಗಳ ನೆನಪಿನ ದೋಣಿಯಲ್ಲಿ ಇಂಥ ಹಾಡುಗಳಿದ್ದರೆ ದುರ್ಗದಲ್ಲಿ ಹಂಚಿ ಕೊಳ್ಳಿ.ಇತರರಿಗೆ ಮುಜುಗರ ತರಿಸದ,ನೋವು ಮಾಡದ ತಿಳಿ ಹಾಸ್ಯ ಚಿಮ್ಮುವ ಹಾಡು ಹಾಡಿ....

GLADIOLUS - Flower Fest

Gladiolus are known by a number of names: Gladiolus, gladiola, "glads", and even "Sword Lilly". Why Sword Lily, you might ask? It's because of their long, sword-like leaves. But, Glads are not members of the lily family. Whatever you like to call them, they are one of the more popular flowers grown in the home garden.
Gladiolus are native to the mountains of South America. They are widely grown in the U.S., Europe and Asian countries too. Gladiolus are easy to grow, and make for a beautiful flower in the garden and in floral arrangements, hence their popularity.
Blossoms come in a wide range of colors and bicolors. The blossoms will open from the bottom first.
With just a little attention, glads will burst into a bloom of tall spikes in August (here in U.S.) But in back home India,(Bangalore) in my parents' garden, we have them almost throughout the the year.Galds are my Appa's favorite!He is just mad about them !

For more on flowers go to "Flower Fest - The A - Z of Flowers"

Flower Fest

ಮಿಸಳ್ ಪಾವ್

ಮಿಸಳ್ ಪಾವ್ ಪಕ್ಕಾ ಮಹಾರಾಷ್ಟ್ರಿಯನ್ ತಿನಿಸು. ಇದರ ಕಸಿನ್ ಪಾವ್ ಭಾಜಿ ಯಂತೆ ದೇಶಾದ್ಯಂತ ಇದು ಖ್ಯಾತಿ ಸಂಪಾದಿಸಿಲ್ಲವಾದರೂ ರುಚಿಯಲ್ಲಿ ಅದಕ್ಕಿಂಥ ಏನೂ ಕಡಿಮೆ ಇಲ್ಲ.ಸಾಮಾನ್ಯವಾಗಿ ಮಿಸಳ್ ಪಾವ್ ನ `ಉಸಳ್' ಮಾಡಲು `ಮಟ್ಕಿ' ಅಂತ ಕರೆಯಲ್ಪಡುವ ಒಣ ಬಟಾಣಿಯನ್ನು ನೀರಿನಲ್ಲಿ ನೆನೆಹಾಕಿ ಉಪಯೋಗಿಸುತ್ತಾರೆ ಜೊತೆಗೆ ಹುಳಿರುಚಿಗಾಗಿ ಪಕ್ಕಾಮರಾಠಿ ಕೋಕಮ್!

ನನಗೆ ಒಣ ಬಟಾಣಿ ಅಷ್ಟೇನೂ ಇಷ್ಟವಿಲ್ಲ ಹೊಟ್ಟೆ ಕೆಡುತ್ತೆ ಅಂಥ ನೆಪ ಹೇಳಿಕೊಂಡು ಬಟಾಣಿಯನ್ನು ಹೆಚ್ಚು ಆರೋಗ್ಯಕರವಾದ ಮೊಳಕೆಬರಿಸಿದ ಹೆಸರುಕಾಳಿನೊಂದಿಗೆ ರಿಪ್ಲೇಸ್ ಮಾಡಿಬಿಟ್ಟಿದ್ದೇನೆ ನಮ್ಮಮನೆಯಲ್ಲಿ.ಕೋಕಮ್ ಎಲ್ಲಾ ಜಾಗದಲ್ಲೂ ಸಿಗುವುದಿಲ್ಲವಾದ್ದರಿಂದ ನಮ್ಮ ಹುಣಸೆಯನ್ನೇ ಉಪಯೋಗಿಸುತ್ತೇನೆ ಸಾಮಾನ್ಯವಾಗಿ ಮಿಸಳ್ ನೊಂದಿಗೆ ಪೋಹಾ(ನೆನೆದ ಅವಲಕ್ಕಿಯ ತಯಾರಿಕೆ)/ ಬಟಾಟ ವಡಾ/ಚಿವ್ಡಾ/ಸಾಬೂದಾನ ವಡಾ(ಸಬ್ಬಕ್ಕಿ ವಡೆ) ಮಾಡುತ್ತಾರೆ. ನಾನು ಅಷ್ಟೆಲ್ಲಾ ತಲೆನೋವು ಮಾಡಿಕೊಳ್ಳೋದಿಲ್ಲ ಆದರೂ ನಮ್ಮನೇಲೆ ನನ್ನ simplified misal paav ಭಾರೀ Hit !

ನನ್ನ ಮಿಸಳ್ ಪಾವ್ ಸ್ವಂತ ವಿಧಾನ ಇಲ್ಲಿದೆ (ಸಾಂಪ್ರದಾಯಿಕ ರೆಸಿಪಿ ಗೂಗಲ್ಲಿನಲ್ಲಿ ಹುಡುಕಿದರೆ ಸಿಗುತ್ತೆ)

ಬೇಕಾಗುವ ಪದಾರ್ಥಗಳು-

ಉಸಳ್-

ಮೊಳಕೆ ಬರಿಸಿದ ಹೆಸರುಕಾಳು-2೦೦ ಗ್ರಾಂ

ಈರುಳ್ಳಿ-ಒಂದು (ದೊಡ್ಡದು)

ಬೆಳ್ಳುಳ್ಳಿ-3-4 ಹೆಳಕು (ಜಜ್ಜಿದ್ದು)

ಶುಂಠಿ-1 ಇಂಚು (ಜಜ್ಜಿದ್ದು)

ಗರಂ ಮಸಾಲ-1 ಚಮಚ

ಅಚ್ಚಮೆಣಸಿನ ಕಾಯಿ ಪುಡಿ-1 ಚಮಚ

ಹುಣಸೇ ಹಣ್ನು-ಗೋಲಿ ಗಾತ್ರ

ಉಪ್ಪು-ರುಚಿಗೆ

ಸಕ್ಕರೆ-1 ಚಮಚ

ಎಣ್ನೆ-1 ದೊಡ್ಡ ಚಮಚ

ಬೇಕಾಗುವ ಇತರ ಪದಾರ್ಥ-

ಸೇವ್-ನಿಮಗೆಷ್ಟು ಬೇಕೋ ಅಷ್ಟು!

ಕೊತ್ತಂಬರಿ ಸೊಪ್ಪು-(ತೊಳೆದದ್ದು)ಅಲಂಕರಿಸಲು

ಈರುಳ್ಳಿ- ಸಣ್ಣಗೆ ಕತ್ತರಿಸಿದ್ದು

ಮಿಸಳ್ ನೊಂದಿಗೆ ತಿನ್ನಲು ಪಾವ್!

ಮಾಡುವ ವಿಧಾನ-
ಮೊಳಕೆ ಬರಿಸಿದ ಹೆಸರು ಕಾಳನ್ನು ಅದು ಮುಳುಗುವಷ್ಟು ನೀರು ಹಾಕಿ ಕುಕ್ಕರಿನಲ್ಲಿ ಎರಡು ಕೂಗು ಕೂಗಿಸಿ. ಬಾಣಲೆಯಲ್ಲಿ ಎಣ್ಣೆ ಇಟ್ಟು ಜಜ್ಜಿದ ಬೆಳ್ಳುಳ್ಳಿ,ಶುಂಠಿ ಹಾಕಿ ನಂತರ ಈರುಳ್ಳಿ ಹಾಕಿಈರುಳ್ಳಿ ಸ್ವಲ್ಪ ಕಂದು ಬಣ್ಣ ಬಂದಾಗ ಬೆಂದ ಹೆಸರು ಕಾಳು ಹಾಕಿ. ಉಪ್ಪು , ಗರಂ ಮಸಾಲ, ಅಚ್ಚ ಮೆಣಸಿನಕಾಯಿ ಪುಡಿ, ಸಕ್ಕರೆ ಹಾಕಿ ಐದು ನಿಮಿಶ ಕುದಿಸಿ.ನಂತರ ಹುಣಸೆ ಕಿವುಚಿದ ನೀರು ಹಾಕಿ ಎರಡು ನಿಮಿಷ ಕುದಿಸಿ ಕೆಳಗಿಳಿಸಿ . ಈಗ ಉಸಳ್ ರೆಡಿ!

ಈ ಉಸಳ್ ಅನ್ನು ಮಿಸಳ್ ಆಗಿ ಪರಿವರ್ತಿಸುವುದು ಬಲು ಸುಲಭ

ಸಣ್ಣ(!) ಬಟ್ಟಲಲ್ಲಿ ಎರಡು ಸೌಟು ಉಸಳ್ ಬಡಿಸಿ ಸಣ್ಣಗೆ ಕತ್ತರಿಸಿದ ಈರುಳ್ಳಿ,ಕೊತ್ತಂಬರಿ ಸೊಪ್ಪು ಮತ್ತು ಸೇವ್ ನಿಂದ ಅಲಂಕರಿಸಿ `ಮಿಸಳ್ 'ತಯಾರ್!
ಪಾವ್ ಅನ್ನು ಮಧ್ಯೆ ಕತ್ತರಿಸಿ ಎರಡೂ ಬದಿ ಕಾಯಿಸಿ `ಮಿಸಳ್ 'ನೊಂದಿಗೆ ಬಡಿಸಿ

ಸಾಯಂಕಾಲದ ಉಪಹಾರಕ್ಕೆ ತಕ್ಕ ತಿನಿಸು ಇದು ಚಳಿಗಾಲದಲ್ಲಿ ಬಿಸಿ ಬಿಬಿ ಹಬೆಯಾಡುವ ಮಿಸಳ್ ಪಾವ್ ತಿನ್ನುವ ಸುಖ..ಆಹಾ! ಜೊತೆಗೆ `ಅದ್ರಕ್ ವಾಲ ಛಾಯ್' ಇದ್ದರೆ`ಸ್ವರ್ಗಕ್ಕೆ ಕಿಚ್ಚು ಹಚ್ಚೆಂದ ಸರ್ವಜ್ಞ....'

ಮಲ್ಲಿಗೆಯ ಪರಿಮಳ ಹರಡಿದ ಸಂಗೀತ

ಅವಳು ಕೂತಿದ್ದು ಧೂಳು ತುಂಬಿದ,ಒಡೆದು ಹೋದ ಕಡಪ ಕಲ್ಲಿನ ನೆಲದ ಮೇಲೆ...
ಎದುರಿಗೆ ಕೂತಿದ್ದು ಒಬ್ಬೇ ಒಬ್ಬ ಶೋತೃ....
ತುಸು ಹೊರಗೆ ಈ ಪ್ರಪಂಚದ ಹಲವು ಗದ್ದಲಗಳು...
ಇದಾವುದರ ಪರಿವೆಯೇ ಇಲ್ಲದೆ ಅವಳು ಹಾಡುತ್ತಿದ್ದಳು...
ಸುಮಾರು ಮೂರು ಘಂಟೆ ಅವಳು ದಣಿವಿಲ್ಲದೇ ಹಾಡಿ ತಲೆ ಎತ್ತಿ ನಕ್ಕಳು...
ಹಳೇ ಕಾಲದ ಆ ಇಡೀ ಕೊಠಡಿ ಹಿಂದೂಸ್ತಾನಿ ಸಂಗೀತದ ಮಲ್ಲಿಗೆಯ ಪರಿಮಳದಿಂದ ತುಂಬಿ ಹೋಗಿತ್ತು...
ಇದು ಕೆಲವು ವರ್ಷಗಳ ಹಿಂದಿನ ಮಾತು...`ಎಲ್ಲ ಕೇಳಲಿ ಎಂದು ನಾನು ಹಾಡುವುದಿಲ್ಲ ' ಎಂಬ ಕವಿವಾಣಿ ನೆನಪಿಸುವಂತೆ ಅವಳು ಹಾಡುತ್ತಲೇ ಪರಿಮಳ ಹರಡುತ್ತಲೇ ಹೋದಳು...ಮುಂದೆ ಒಂದು ದಿನ ಅವಳನ್ನು `ರಾಜ್ಯೋತ್ಸವ ಪ್ರಶಸ್ತಿ' ಹುಡುಕಿಕೊಂಡು ಬಂತು...

ಆ ಅನುಪಮ ಗಾಯಕಿ ಸಂಗೀತಾ ಕಟ್ಟಿ
ಅವಳು ಹಾಡಿದ್ದು ಬೆಂಗಳೂರಿನ ಮೈಸೂರ್ ಬ್ಯಾಂಕ್ ವೃತ್ತದ ಬದಿಯಿರುವ ಬೆಂಗಳೂರು ವಿಶ್ವವಿದ್ಯಾಲಯದ ಹಾಸ್ಟೆಲ್ ರೂಮಿನಲ್ಲಿ...
ಎದುರಿಗೆ ಕೂತಿದ್ದ ಒಬ್ಬೇ ಒಬ್ಬಳು ಶೋತೃ ಶಾಸ್ತ್ರೀಯ ಸಂಗೀತದ ಗಂಧ ಗಾಳಿ ತಿಳಿಯದ,ಆದರೆ ಒಳ್ಳೇ ಸಂಗೀತವನ್ನು ಆನಂದಿಸುವ ಕಿವಿ ಇದ್ದ ನಾನು...

ಅಭಿನಂದನೆಗಳು...ಸಂಗೀತಾ...

`ಬೆಸ್ಟ್ ಆಫ್ ಸುನಂದಮ್ಮ'

ವೃಷಭ ವಾಹನದ ಹಾರನ್ ಕೇಳಿತು.ಒಳಗೆ ಬಂದಳು ಗೌರೀದೇವಿ. ನವಿರಾದ ಬೂದು ಬಣ್ಣದ ಸೀರೆಯುಟ್ಟು ಅದೇ ರಂಗಿನ ಕುಪ್ಪಸ ತೊಟ್ಟಿದ್ದಳು. ಕಿವಿಯಲ್ಲಿ ಬೆಳ್ಳಿಓಲೆ, ಕಲ್ಚರ್ಡ್ ಮುತ್ತಿನ ಕೆನ್ನೆಸರಪಳಿ, ಕೊರಳಲ್ಲಿ ಬೆಳ್ಳಿಹಾರ, ಕಾಲಿಗೆ ಬೆಳ್ಳಿಗೆಜ್ಜೆ, ಬಾಚಿ ಮೇಲೆತ್ತಿ ಕಟ್ಟಿದ ಮುಡಿಯೊಳಗೆ ಬೆಳ್ಳಿತಿರುಪಿನ ಹೂ,ಕೈಯಲ್ಲಿ ಬೂದುಬಣ್ಣದ ಚರ್ಮದ ಜಂಭದ ಚೀಲ...! ಶಿವ ಬೆಚ್ಚಿದ!
ಇವಳೇ ನನ್ನ ರಾಣಿ?ಕೈಲಾಸದರಸಿ ಶಿವೆ?

`ಪಾರ್ವತೀ... ಹಬ್ಬದ ದಿನ ಇದೇನು ನಿನ್ನ ವಿಚಿತ್ರ ವೇಷ? ನಾನು ಉಡುವ ಚರ್ಮವನ್ನು ನೀನೇಕೆ ಕೈಯಲ್ಲಿ ಹಿಡಿದಿರುವೆ?'

`ವಿಚಿತ್ರವೇನಿಲ್ಲಾ ಸ್ವಾಮೀ..ಇದು ಕಾಲಕ್ಕೆ ತಕ್ಕಂಥ ಉಡುಗೆ...ಇದು matching ಕೈಚೀಲ ನಾನುಟ್ಟಿರುವುದು ನೈಲಾನು...'

`ನೈಲಾನು? ಅದೇನು ಹಾಗೆಂದರೇ...?ನಿನಗೆ ಉಡಲು ಸೀರೆಯಿಲ್ಲವೇನು? ನಿನ್ನ ತಂದೆ ಪರ್ವತರಾಜ ಪೆಠಾರಿ ತುಂಬಾ ಹೊರಿಸಿ ಕಳಿಸಿದ ಚೀನಾಂಬರಗಳೆಲ್ಲಾ ಹರಿದು ಹೋದುವೇ? ಮದುವೆಯಲ್ಲಿ ನಾನು ತಂದಿರಿಸಿದ ಪಟ್ಟೆ ಬನಾರಸಿಯ ಕಟ್ಟುಗಳೆಲ್ಲಾ ಕಳೆದು ಹೋದುವೇನು?'

`ಎಲ್ಲಾ ಇವೆ, ಆದರೆ ಅವೆಲ್ಲಾ ಹಳೆಯ ಫ್ಯಾಷನ್ನು...ಯಾರು ಉಡುತ್ತಾರೆ? ಭೂಲೋಕದ ಲಲನಾಮಣಿಯರೆಲ್ಲಾ ಉಡುವುದೇ ಇದನ್ನು. ಇವನ್ನು ಒಗೆಯ ಬೇಕಾಗಿಲ್ಲ,ಒಗೆದರೂ ಹಿಂಡಬೇಕಾಗಿಲ್ಲ, ಇಸ್ತ್ರಿಯಂತೂ ಬೇಕೇ ಇಲ್ಲ- Dip-N-Dry ಅನ್ನುತ್ತಾರೆ ಇವುಗಳಿಗೆ. ಆರು ತಿಂಗಳಿಗೊಮ್ಮೆ ನೀರಿನಲ್ಲಿ ಅದ್ದಿ ಆರಿ ಹಾಕಿದರಾಯಿತು...ಇದೋ ನೋಡೀ...ನನ್ನ ಭಕ್ತೆಯರು ಇವತ್ತು ನನಗೆ ಅರ್ಪಿಸಿರುವ ರವಿಕೆಗಳು-ಟೆರಿಲಿನ್,ನೈಲಾನ್,ಆರ್ಲಾನ್,ಮಾರ್ಲಾನ್,ನೈಲೆಕ್ಸ್...!ಇದು ಕಪ್ಪು ಹಣದ ಬಂಡವಾಳಗಾರನ ಹೆಂಡತಿ (ಪಾಪ ಪರಿಹಾರಕ್ಕೆ) ಕೊಟ್ಟಿರುವ ಸೀರೆ-ಇದನ್ನು ಡ್ರೇಲಾನ್ ಅನ್ನುತ್ತಾರೆ....'

`ಛೀ! ಇದೇನು ಬಟ್ಟೆ? ಕತ್ತರಿಸಿ ಷಣ್ಮುಖ,ಗಣೇಶರ ಕೋಣೆಯ ಬಾಗಿಲಿಗೆ ಪರದೆ ಹಾಕು...ಅಥವಾ ಓದುವ ಮೇಜಿಗೆ ಹೊದಿಸು...ಹುಂ?ಈ ಬೆಳ್ಳಿ ಒಡವೆಗಳೇಕೆ?ಬಂಗಾರ ವಜ್ರ ವೈಢೂರ್ಯಗಳೇನಾದವು?ರಕ್ಕಸರೇನಾದರೂ ಅಪಹರಿಸಿದರೇನೂ?'

`ಇದೂ ಭೂಲೋಕದ ವ್ಯವಹಾರ.. ಬಂಗಾರ ವಜ್ರ ಕೆಂಪುಗಳನ್ನು ಲಾಕರಲ್ಲಿಟ್ಟು ಬಾಡಿಗೆ ತೆತ್ತು ಬೆಳ್ಳಿಯದೋ ,ಕೃತಕಾಭರಣಗಳನ್ನೋ ಧರಿಸುವುದೇ ಅಲ್ಲಿನ ವಿಚಾರ...'

`ಅದೆಲ್ಲಾ ಭೂಲೋಕದ ಮಾತಾಯ್ತು..ನಮಗೇಕೆ ಅವರ ಅಚಾರ ವ್ಯವಹಾರದ ಅನುಕರಣೆ?ನಮ್ಮ ಎತ್ತುಗಳಿಗೆ ಹಾಕುವ ಈ ಒಡವೆಗಳನ್ನುಮೊದಲು ತೆಗೆದು ಬಿಸಾಡು...ಗಾಳಿಗೆ ಹಾರಿ ಹೋಗುವ ಈ ಸೀರೆಯನ್ನು ಬದಲಿಸಿ, ನನಗಿಷ್ಟವಾದ ನವಿಲುರಂಗಿನ ಜರತಾರಿ ಸೀರೆಯುಟ್ಟು ಬಾ...'

ಪೂಜೆಯ ಧೂಪ ದೀಪದ ಕಾವೇರಿತ್ತೇನೋ...ಪಾರ್ವತಿ ದುರ್ಗೆಯಾದಳು... ಪರಮೇಶ್ವರನ ಮಾತಿಗೆ ಕಿವಿಗೊಡಲೇ ಇಲ್ಲ ಕೋಪದಿಂದ ಶಿವ, ಟಿಫಿನ್ ಕೂಡಾ ತಿನ್ನದೇ ತನ್ನ ಢಮರುಗ ಎತ್ತಿಕೊಂಡು ನೃತ್ಯಾಲಯದ ಕಡೆ ನಡೆದ.......

*********************************

ಕನ್ನಡ ಹಾಸ್ಯ ಸಾಹಿತ್ಯದ ಹಿರಿಯಜ್ಜಿ ಎಂದೇ ಹೆಸರಾದ ಟಿ.ಸುನಂದಮ್ಮನವರ `ಬೆಸ್ಟ್ ಆಫ್ ಸುನಂದಮ್ಮ' ಪುಸ್ತಕದ ಒಂದು ಸಣ್ಣ ಸ್ಯಾಂಪಲ್ ಇದು.ಇನ್ನೂರಕ್ಕೂ ಹೆಚ್ಚು ಪುಟಗಳ ಈ ಪುಸ್ತಕದಲ್ಲಿ ನಗೆ ಮಿಂಚು ಹರಿಸುವ ಹಲವಾರು ಲೇಖನಗಳಿವೆ ನೆನ್ನೆ ಮೊನ್ನೆ ನಾನು ಈ ಪುಸ್ತಕ ಓದುತ್ತಾ ನಕ್ಕೂ ನಕ್ಕೂ ಸುಸ್ತಾದೆ...

ಮಾರ್ನಿಂಗ್ ಗ್ಲೋರಿ ಪೂಲ್

ಪೂಲ್ ನ ನಡುವಲ್ಲಿ ಕೊತಕೊತ ಕುದಿ ಕುದಿಯುತ್ತಿರುವ ನೀರು....

ಚಿತ್ರಗಾರನೊಬ್ಬನ ಬೃಹತ್ ಪೆಲೆಟ್ ನಂತೆ ಕಾಣುವ ಪೂಲ್....

ನೀಲಿ,ಹಸಿರು,ಬಂಗಾರ,ಕಂದು,ಕೆಂಪುಗಳ ವರ್ಣ ವೈಭವ...

ಕುರುಡನೊಬ್ಬ ಆನೆ ವರ್ಣಿಸಿದಂತೆ ನಾನು ಮಾರ್ನಿಂಗ್ ಗ್ಲೋರಿ ಪೂಲ್ ನ ಸೊಬಗನ್ನು ವರ್ಣಿಸುತ್ತಿದ್ದೇನೆ!

ವಿಶ್ವದ ಮೊದಲ ನ್ಯಾಶಿನಲ್ ಪಾರ್ಕ್ ಅಮೇರಿಕಾದ ವಯೋಮಿಂಗ್ ರಾಜ್ಯದಲ್ಲಿರುವ `ಯೆಲ್ಲೋ ಸ್ಟೋನ್ ನ್ಯಾಶಿನಲ್ ಪಾರ್ಕ್ನನಲ್ಲಿ ಈ ಮಾರ್ನಿಂಗ್ ಗ್ಲೋರಿ ಪೂಲ್ ಇದೆ.ಈ ಪೂಲ್ ಒಂದು ನೈಸರ್ಗಿಕ ಗೀಸರ್.ನೆಲದೊಳಗಿನ ಶಾಖೋತ್ಪನ್ನ ಕ್ರಿಯೆಯ ಪರಿಣಾಮವಾಗಿ ಅಂತರ್ಜಲ ಬಿಸಿಯಾಗಿ ಚಿಮ್ಮುವ ಕ್ರಿಯೆ ಈ ಸುಂದರ ಪೂಲ್ ಅನ್ನು ಸೃಷ್ಟಿಸಿದೆ ಬೇರೆ ಬೇರೆ ತಾಪಮಾನದಲ್ಲಿ(ಶಾಖದಲ್ಲಿ) ಬೆಳೆಯುವ ವಿವಿಧ ಜಾತಿಯ ಆಲ್ಗೆಗಳು(Alge) ಪೂಲ್ ಗೆ ಬಣ್ಣ ಬಣ್ಣದ ಉಡುಗೆ ತೊಡಿಸಿವೆ ಉದಾ-ಪೂಲ್ ನ ನಡುವಿನ ತಾಪಮಾನ ಸುಮಾರು167 F ರಿಂದ 180F ಮತ್ತು ಇದು ನೀಲಿ ಆಲ್ಗೆ ಬೆಳೆಯಲು ಪ್ರಶಸ್ತ ತಾಪಮಾನ.ಹೊರ ಅಂಚು ಅಷ್ಟು ತಾಪ ಹೊಂದಿಲ್ಲವಾಗಿ ಕಂದು ಆಲ್ಗೆ ಗೆ ಸರಿಯಾದ ತಾಪಮಾನ...ಹೀಗೆ...

ಒಂದೊಮ್ಮೆ ಮಾರ್ನಿಂಗ್ ಗ್ಲೋರಿ ಹೂವಿನಷ್ಟೇ ಸುಂದರ ಕಡು ನೀಲಿ ಬಣ್ಣ ಹೊಂದಿ ಕಂಗೊಳಿಸುತ್ತಿದ್ದ ಈ ಪೂಲ್ ಪ್ರವಾಸಿಗರ ಬೇಜವಾಬ್ದಾರಿ ವರ್ತನೆಯಿಂದಾಗಿ (ನಾಣ್ಯ ,ಕಲ್ಲು ಎಸೆಯುವುದರಿಂದಾಗಿ) ಸೊಬಗು ಕಳೆದು ಕೊಂಡು Fading glory ಅಂತ ಕರೆಸಿ ಕೊಳ್ಳುತ್ತಿದೆ

ಮಾರ್ನಿಂಗ್ ಗ್ಲೋರಿ

Oh, Morning Glory!

The Morning Glory
It has taken the well bucket
I must ask elsewhere for water
-Chiyo ni

ಆಕಾಶ ನೀಲಿ ಬಣ್ಣದ ಸುಕೋಮಲ ಹೂ ಮಾರ್ನಿಂಗ್ ಗ್ಲೋರಿ. ಪೀಪಿ ಆಕಾರದ ಸೂಕ್ಷ್ಮ ಪ್ರಕೃತಿಯ ಚೆಲುವೆ ಗುಲಾಬಿ,ಸೇವಂತಿಯರಂತೆ ಈ ಹೂಗಳು ವಾರಗಳಗಟ್ಟಲೆ ನಲಿಯಲಾರವು ಬೆಳಗ್ಗೆ ಪಳಪಳ ಮೃದುಮೈ ತೋರುತ್ತಾ ಹೊಳಪಾದ ನೀಲಿ ಜ್ವಾಲೆಯಂತೆ ಬೆಳಗುತ್ತಾ ಅರಳಿ ಸಂಜೆಗೆ ಬಾಡಿ ಹೋಗಿಬಿಡುತ್ತವೆ ಒಂದೇ ದಿನದ ವೈಭವ....

ನಾವೆಷ್ಟು ಕಾಲ ಬದುಕಿದೆವೆಂಬುದು ಮುಖ್ಯವಲ್ಲ. ನಾವು ಬದುಕಿದಷ್ಟು ಕಾಲ ಎಷ್ಟು ಹೃದಯ,ಮನಸ್ಸುಗಳನ್ನು ಬೆಳಗಿಸಿದೆವು ಎನ್ನುವುದೇ ಮುಖ್ಯ ಎಂಬ ಪಾಠ ಹೇಳುತ್ತಿವೆಯೇನೋ ಅಂತ ಪ್ರತಿಸಲ ಈ ಪುಟಾಣಿ `ಗ್ಲೋರಿ' ಗಳನ್ನು ನೋಡಿದಾಗಲೆಲ್ಲಾ ನನಗೆ ಅನ್ನಿಸುತ್ತೆ...

ಎದುರಿಸಬೇಕು ಧೈರ್ಯದಿಂದ...

ಬಿಸಿಲಿಗೆ ಕರಗೋ ಮಂಜೇನಲ್ಲ

ಕಷ್ಟ ನಷ್ಟ ಎಲ್ಲಾ

ಎದುರಿಸಬೇಕು ಧೈರ್ಯದಿಂದ

ಬೇರೆ ದಾರಿ ಇಲ್ಲಾ

ಬೆಟ್ಟ ಕೊರೆದು ದಾರಿ ಮಾಡಿ

ನೀರು ನುಗ್ಗೋ ಹಾಗೆ

ಮುಂದೆ ನುಗ್ಗಿ ಹೋದ್ರೆ ತಾನೇ

ದಾರಿ ಕಾಣೋದ್ ನಮ್ಗೇ...

**********

ನಿಮ್ಮಲ್ಲಿ ಹಲವರು ನನ್ನ ಇ-ಮೇಲ್ ಐ.ಡಿ ಕೇಳಿದ್ದೀರಾ...ಕಾಳಜಿಗೆ ಧನ್ಯವಾದಗಳು
ನಾನು ವಾರಕ್ಕೊಂದು ಬಾರಿ ಮೇಲ್ ಚೆಕ್ ಮಾಡುವ, ತಿಂಗಳಿಗೊಂದು ಸಾರಿ ರಿಪ್ಲೆ ಮಾಡುವ
ಜಾತಿ....ಬೇಗ ರಿಪ್ಲೆ ಬರಲಿಲ್ಲ ಅಂತ ಬೇಜಾರು ಮಾಡಿಕೊಳ್ಳದಿದ್ದ ಪಕ್ಷದಲ್ಲಿ ನನಗೆ ಮೇಲ್ ಕಳಿಸಿ
ನಿಮ್ಮೆಲ್ಲಾ ಕಮೆಂಟ್ಸ್ ಗಳನ್ನು ಬ್ಲಾಗ್ ನಲ್ಲೇ ಹಾಕಿದರೆ ಉತ್ತಮ.ಸ್ವಂತ ಬ್ಲಾಗ್ ಇಲ್ಲದವರು
`ಅನಾನಿಮಸ' ಆಯ್ಕೆ ಮಾಡಿಕೊಂಡು ನಿಮ್ಮ ಹೆಸರು ಟೈಪಿಸಬಹುದು.....
ನನ್ನ ಐಡಿ mala1427@yahoo.com